好多人都將「咁」同「噉」都用晒「咁」
其實佢哋嘅用法係完全唔同嘅，只係讀音差少少。
究竟有乜唔同呢？我哋先睇下以下嘅例子先：

「唔係嘛！咁鬼熱，梗係要開冷氣啦！」不是嘛！這麼熱，當然要啟動空調啊!
「今時今日噉嘅服務態度未夠㗎！」現時這樣的服務態度仍未足夠的！

而家，尤其係香港人都唔分呢兩個字，一律只用「咁」。

原本啲人都有分開呢兩個字嘅，搞到咁多人認為呢兩個字一樣嘅罪魁禍首都係香港嘅娛樂新聞記者，之後重有互聯網做幫兇將佢「發揚光大」。

識得分或這會分呢兩個字嘅人真係非常之少。我試過喺搜尋器都搵「噉樣」，發覺都唔係完全冇㗎喎，仍然發現有啲蹤跡，不過真係極少。

但實際上從音、義上都係唔同嘅，睇吓下邊嘅解釋啦。

「咁」讀音: gam³ [禁]
解釋:
１.這麼、那麼 (例:)咁凍先可以防上變壞。 [這麼冷才可以防止腐壞。]
２.多麼 (例:)今日咁熱㗎！ [今天多麼熱啊！]

「噉」讀音: gam² [敢]
解釋:
１.指示代詞，這樣、那樣 (例:)噉就死喇！ [這樣就糟糕了！]
２.助詞，似的 (例:)佢個頭好似個橙噉。 [他的頭樣個橙似的。]
３.助詞，地 (例:)佢好大聲噉講嘢。 [他很大聲地說話。]

如果你重係覺得好難分，你可以試吓記讀音。
讀 gam² [敢] 嘅，就係「噉」；
讀 gam³ [禁] 嘅，就係「咁」。

噉樣記就實o店啦！