「重有」意思即是「還有」，但卻有人寫成「仲有」， 這是錯的。

除了「重有」，
「重係」「重想點？」等中的「重」很多人錯寫成「仲」。

廣府話嘅「重」字，多音多義，而且好常用。

錯寫成「仲」，係出於香港娛樂記者嘅手筆，竟然傳到通街都係，實在可憐。
終於傳到互聯網，互聯網嘅傳播速度比報紙雜誌快好多倍。
好彩我都重見到有人用「重」，不過就真係比較少喇。

「仲」字一般解作「居中」，表示係中間嘅位置。最常見嘅係用嚟表示每季嘅第二個月，例如春季第一個月叫做「孟春」，第二個月就叫做「仲春」。同一道理，秋季嘅第二個月，就係「仲秋」了。至於古時兄弟姊妹之間，排行第一嘅叫做「伯」，排第二嘅就叫做「仲」嘞。

「重」字讀 zung6 [同音字: 頌] 時，有「再」、「還」嘅意思。

其實呢個音義相當之古雅，

《爾雅·釋天》：「太歲在辛曰重光。」
呢個「重光」唔係讀「從光」，因爲唔係暗而復光，而係「更加光」，所以應該讀做「頌光」。
所以〈釋文〉話，「重」字讀「直龍切」(即zung6)。

《樂府》：「行行重行行，與君相別離。」
呢一句詩唔用廣府音嚟讀唔得。「行行」讀做「行街」嘅「行」。──呢個音見於《廣韻》，下夏切，即係haang4音。解爲「行跡」。
「行行」，係一路行，愈行愈遠，「重行行」，即更加行，噉先顯得出「與君相別離」嘅無可奈何。

屈原《離騷》：「紛吾既有此內美兮，又重之以修能。」
意思即係屈原既有此內在之美質，還更有絕遠之能耐。
漢朝嘅王逸喺解釋《離騷》此文時，就話：「內含天地之美氣，又重有絕遠之能。」
王逸呢一句「重有絕遠之能」，同我哋今日所講嘅：「重有最靚豬腩肉」，喺句式結構上並無二致。
宋朝嘅洪興祖解釋《離騷》「重」字嘅時候話：「『重』，儲用切，再也，非輕重之重。」可見《離騷》呢句「重」字應讀去聲，正係「再次」嘅意思。

參考：
【王亭之專欄】
香港中文大學中文系 博文, 每周話題