所謂懶音，其實即係發錯音或者係發音唔準。但係點解叫做「懶音」呢？
啲人會將某種聲母/韻母讀成另一種發音較慳力嘅聲母/韻母；
懶音現象列表
聲母
n 聲母 讀成 l 聲母
ng 聲母 讀成 零聲母
gw 聲母 讀成 g 聲母
kw 聲母 讀成 k 聲母韻母
-ng 韻尾 讀成 -n 韻尾
-k 韻尾 讀成 -t 韻尾
ng 鼻韻 讀成 m 鼻韻*有懶音嘅人未必每種懶音現象都有齊
成因
（以下以「n 聲母 讀成 l 聲母」作為舉例）
多數人都係認為係主因係因為 l 聲母 嘅發音會比 n 聲母 容易啲，
所以啲細路學講嘢嗰陣，捨難取易，慢慢養成懶音。養不教 父(母)之過
因為啲父母教仔嘅時候根本冇理到啲細路讀 n 音 定係 l 音，
佢哋淨係會關心有冇將「檸檬」講做「橙」。
就算將
「檸(n 聲母)檬」讀成「零(l 聲母)檬」；
「橙(-ng 韻尾)」讀成「產(-n 韻尾)」
都唔會理。不過而家好多父母自己都有懶音，所以讀錯都唔知。
但係其實我覺得 n 聲母 未必真係難讀過 l 聲母。
我讀咁多年英文都好清楚n音同l音嘅分別，好細個已經識。
用普通話講「你好」嘅時候，「你」字都會好自然噉發n音。
反而講廣州話有時都會口快發咗l 聲母嘅「理」，呢個又係習慣嘅問題。我哋學母語唔會好似學外語（英文、普通話、日文...）噉學咗拼音先，
冇咁注重音韻，只求音似，冇注意到咁細緻嘅分別。
大咗又唔會留意翻，因為自細以咁多年嚟嘅溝通都好成功。
懶音就一代「遺傳」一代。
同人講佢有懶音，好多人都會話「明咪得囉！」。係，雖然講嘢有懶音未必真係會引起乜嘢笑話，或者令人唔明你講乜。因為可以靠上文下理推敲講緊乜（又可能香港人已經「習慣」晒懶音），但係帶有懶音嘅粵語已經唔係正宗、標準嘅粵語。外國人學廣州話，分分鐘重準過我哋！重有，如果識得講標準粵語嘅人聽到呢啲懶音，會講得好唔舒服，我有時聽到都打晒冷震！
歡迎大家引用本文。
